Gabay waxaa tiriyey alle ha u naxariistee abwaan abshir nuur faarax (abshir bacadle)
1_ Haddii lays qadariyey, murti qiima leedahaye
2_ Qasadkiyo ujeedaduna, waa qiima galiyaane
3_ Sidaad ugu qotomisay, nafluhu ugu qushuucaane.
4_ laguu soo qadimo, kama qatoobaane
5_ Suugaantu waa qayb ka mid ah, qalabka taariikhda
6_ Qoraalladuna kaba qiima badan, mana qarsoomaane
7_ Nin waliba waxaa uu noo qabtiyo,Qaladkuu noo gaystay
8_ Diiwaanno qoran baa jiroo, loogu qorayaaye
8_ Qof quraarad calashoo dejiyey, qoomamee abidee
10_ Qarniyada dambaa kugu lacnada, ficilka qaarkiise
11_ Intaad qaranka kala goo laheyd, quruxso taariikhda
12_ Quruun waliba cudur qaas ahoo, qaybiyaa jira e
13_ Soomaali balo loo qoraye, qalinka loo saaray
14_ Wax qabiil ka daran jahannamaan, qiray aqoontayda
15_ Qadartaana iga hiilisaye, qolo ma sheegteene
16_ Qof qalbigii qabyaalad iyo diin, qaadi kari waaye
17_ Umana qaybsamee meel un buu, qac uga siiyaaye
18_ Ma anaa qur’aankiyo ka taga, qowlkii nabigeena?
19_ Qabrigayga ma anaa gatoo, qubaya diintayda
20_ Qatli muumin ma anaa hub iyo, qarash ku taageera?
21_ Ma anaa qabil door bidoo, qaranka aafeeya?
22_ Waa quud ka dhigo ruux muslin ah, hilibkii qayriine
23_ Ilaahayoow adigu haygu qaban, qaadir baad tahaye
24_ Qof muslim ah gabyaalad u diloon, ficiliyo qawl geysan
25- Qasadkiyo ujeedaduna tahay, lagu qisaasaayo
26- Qabiilkaa muxuu uga dhashaye, qaadir uga yeelay
27- Qiso murug iyo yaab leh oo, quruna sow maaha?
28- Qof kastoo ka qayb qaata, ama qarash ku taageera
29- Nafta goorta laga qadaayo, laga qibloonayo
30- Qarqaradiyo dhuunyeeriskiyo, qara la taahiisa
31- Diiwaanka qalinku ku dhacay, qoomaamee abide
32- Qaraabo iyo ehel rixinnimaa, loo qaddariyaaye
33- Waa sanam qabyaaladii, haddaad igu qancaysiine
34- Qaaxo iyo kaankariyo, Aydhis qaab darane
35- Waa cudurka qaybaha bulshadu, qaran ku waayeene
36- Waa shey Rabbigay noo qaddaray, naguna qaameeyey
37- Waa qowqam iyo sixir qalbiga, qaaciyoo shida e
38- Waa qaaba- qawseyn dagaal, qac iyo yaahuuye
39- Qaajir boogi qaadatoo qurmoo, qolof la’ weeyaane
40- Waa gorofta lagu qaybiyaa, malaxda qayriine
41- Qandiga fuqurka iyo xaasidkoo, qaraxa weeyaane
42- Waa waxa qaxootiga ka dhigay, boqol kunoo qoyse
43- Waa waxa qalbiga nooga riday, qaata ubadkiina
44- Waa guri qabya ah oo waligiiyo, lagu qaraabtaaye
45- Waa shay quraafaad ahoo, aad qadarisaane
46- Qalbigiinna ka ilaashadoo, wadajir qiimeeya
47-Oo qaan-gaar fidnoobee ilmaha, yaan la qabadsiinin